Griaßenk, meine liabn Leit!
@Ruflo: då stimm i nit gånz mit dir ibaein. Wås du vuaschlågst warat Zensur, und des is dås letzte, wås i måchn tat. Es gibt natirlich Grenzn, de ma nit ibaschreitn teaf - also wenns Menschenfeindlich weat, dånn is Sense - oba man muaß a drån denkn, WER's schreibt. Womma den Coolatling nit kennt dånn wamsts an aus die Påtsch, oba mia kennan ihn jo eh und mia wiss ma a, dass a nit 100%ig fit is. Oba trotzdem homma ihn gern. Also i zumindest. Bei ihm kemma glab i schon a bissale mehr duachgehn låssn wie bei åndare, oda eppa nit? Und dass a vül vom Kruschpln dazöhlt kånn i ma vuastölln. Sei Liabste stöllt sicha imma wås volle guates am Tisch. Is jå schen, dass ihm so schmeckt. Ondare Leit (Ånwesende ausgnomman!) måtschgan iba ålles und jedn ummanånd ånstått dass amål die Augn aufmåchn und segn, wie guat's uns (fåst) ålln geht. Bei an jedm gehts a amål bessa und dånn wieda nit. Wo Licht is, då is a Schåttn. Und umgekehrt. Und wenn i ma den Coolatling ånschaug, wie positiv er eigentlich duachs Lebn geht, dånn muaß i anfoch den Huat ziagn! Schapo! Då kånn i vül von ihm lernan.
Drum teaf a bei mir a mehr als jeda Ondare.
Und sunst glab i nit, dass es wås hölfat, wenn i die villacher.net Seitn umbaun tat (wofia i momentan oba sowos von ka Zeit hett, leida!). Des is lei des Wirtshaus. Wenn die Gäst vom Ståmmtisch nåch 10 Joa niama wolln (oda a sich gegnseitig niama hean kennan), hülfts a nix, wenn neich ausgmåln weat. Umziagn hülft a nix. Dass da Cooley nit aufs Facebuach wüll konn i vastehn und: RECHT HOT A! I håb mi seit letztm Oktoba aus OLLE (a-)sozialn Netze vatschüsst und waßt wås: guat woa des, sehr guat sogoa! Wenn's die Leit nutzn tatn und wos intaressantes beitrågn, warats jo klass. Oba leida findet ma 99% Schaß. Es is anfåch sowås von inflazionär, dass es an die Zeit (und des is ans da wertvollstn Såchn, de ma håm!) auffrisst und des, wås vielleicht wichtig warat, eh ibasegn weat. Also AusMausRaus und guat is. Wånns bressiert und es betrifft MI, dånn findn mi die Leit schon.
Åba zruck zum Thema. I håb eich wirklich ålle ins Herz gschlossn und warat traurig, wenn ihr niama in die wirtuelle Wirtsstubn kumman tatets. Oba woatets bitte nit drauf, dass da Wirt eich wieda zommanbringt. Des kennts nur ihr sölba. Vielleicht sollt ma uns wieda amål im Brauhof zu Villach zommanhuckn - das ma uns wieda amål "riachn" kennan. Kennt sein, dass ma uns durt die Tella um die Ohrn haun, weil ma uns so am Zaga gehn. Donn is holt so. Oba i glab, dass des nit so is, weil in wirklichkeit samma eh olle Stubnhucka und kumman imma gern wieda zum Wirtn aufn Ståmmtisch zruck. Du kånnsts jå a nit låssn, Ruflo, und des gfreit mi, weil du tatast ma schon obgehn!
Måchzes guat!
da Wuhte aka da Wirt | 
