... fier grobe vaschmutzungen geht a kåtz aa, wenn se die krempl ausfåhrt...
an guatn morgen und an scheenen tåg wientsch i eich ålln.
kummt er heit? oda niet? da ångikündigte neischnee? a metta und mehr håmtze xågg? i, wenn des mi frågtz, i brauch kaan mehr. åba mi frågt jå kaana.
fier die gegend rundummadum ies ginua weiß, fier die schifåhra reichtz aa. und auf da stråßn brauchn mia kaan.
tuamma hålt åbwårtn, schaugn mia amål, nåachan sehgn mia schon.
und die postla werdn heite aa streikn. recht håmtze. ies jå a sauarei, wenn des kummen werd, wås de großkopfertn männetscha planen, damiet dass se noch mehr fier siech ausaschlågn können. und de vüln briafträga kostn jå lei an haufn göld.
i siehg schon, wia unsa postla in a påår jåhr auf an åltn kleppa daherreitet, ins posthorn blåst und schreit "trari-trara-die post ist da!" und nåachan rennen die gånzn kreizna auf an haufn z'såmm und holnt siech senare briaflen åb.
hoffentliech kånn er reitn.
da postla.
sunst åba fållt.
und wenn da ålte postgaul eingeht, werntze a groaße kiestn aufstellln in feistritz und durt ålls eineschmeißn. nåachan kånn siech a jeda sei glumpp durt sölba åbholn. aa ka bruplem. seind jå eh lei - je nåch wohnort- åcht bies zähn killometta oda mehr und de åltn manndlen und weiblen solltn lei a biessale biwegung måchn, und siech niet aufregn. schådet senen eh niex.
falleicht håmtze jå aa noch iergendawo in an musähum a ålte ausrantschirte postkutschn? hihi, des warat a gaude. könnetn mia postkutschnieberfåll spüln wia in de wüldwestfülme.
håb i es aane mål von aana fierma a werbegischenk kriagt, brauch i lei 2 eiro fuffzg portogibühr miet an erlågschein aufgebm. kostet aa lei 3 eiro da erlågschein. | 
