die gånze nåcht håtz gschiettet, åba hiatzt ies vurbei. da nebl steigt auf und falleicht kummt sugår die sunne a biessale ausa.
måchtz lei auf enkare guggalen und i wientsch eich an scheenen najen tåg und an guatn wochnbiginn
håbtz heite schon die zeitung glesn? fuaßbåll, fuaßbåll, fuaßbåll, fuaßbåll, fuaßbåll, fuaßbåll, fuaßbåll, fuaßbåll, fuaßbåll, fuaßbåll, fuaßbåll, und wås noch? a jå: fuaßbåll.
sunst gips eh niex, wås die leit intarissirn taatet. i gfrei mi soooo.
die zeitung håt sugår außnumatumm a fuaßbållmantale uma de haaßt beilåge. åba weil sie so wiechtig ies, ies se niet beiglegt sundern außn umaghenkt.
und wia scheen warat des, wenn se åb murgn die zeitung a biessale rund zuaschneidn taatetn, damiet des blaattl schon von weitm wia a fuaßbåll ausschaugn tuat. des warat a gaude. und jeda, der es blaattle lesn tuat kriagt als preis an fuaßbåll gschenkt.
und ållas åndriege - öl und penziehn, lebmsmiettlpreise, streitareien ieber unsa xundheitssiestehm, pehnsionen, jugndårbeitzlosigkeit undsoweita und wås unsriege reGIERung sunst noch mit und fier uns vur håt - ållas wurscht.
ies wia im åltn rom: panem et circenses. lei der unterschied ies, dass ma mia uns es pane aa båld niamma werdn leistn können....
dås maant da ruflo, der ålte sudhefn.
und wenn die EM vurbei sein werd, nåachan werdn die leit stått aana ledawuchtl wieda senare nurmale wissasche aufm håls trågn, werst sehgn! | 
