so, wieda a neicha tåg... und a påår leit gips ångebliech iemma noch, de miet an nurmaln kopf stått miet aana fuaßbållwuchtl aufm håls umanånda steign. åba niamma lång. nåachan gips wieda långe gsiechta.
wieda a neicha tåg? jå ginau. und a såmståg ies des aa noch dazua.
weetta soll a beessa werdn, håmtze xågg. wås wüll man mehr?
und am näxtn såmståg ies gottzeidånk der monat aa vurbei, kriagn mia båld wieda viehnatzinellen nåchschub, damiet mia wieda unsriege aute volltankn können. und so...
a so a schaaß, hearst, wo werd denn des noch hienfiehrn? wer kånn siechs denn noch leistn, zur årbeit zan fåhrn?
"jå, fåhrtz hålt miet die öffis, des sudhefn, des ies bielliga."
leicht xågg. wenn ma aane hättetn, aane öffis. mia von da kreizn terfn zerst 8 kiehlometta nåch feistritz åbehaatschn zur pushåltetstell, oda går zehne zum båhnhof. und haamwärtz nåachan auf 1000 metta höhe aufe aufn berg schnaufn
"jå und? wia wårs denn frieher, des jammara, ha? håtz då falleicht aane aute gebm odawia?"
frieha håmma an greißla ghåbt, wo ma von de strumpfbandln bies zua de nåchtpfaadlen, vom griaßzucka bies zua de tuttlflaschlen ållas kriagt håt, wås da mäntsch braucht zum lebm. håmtze hien gmåcht, die greißla, dafier gips "einkaufszentren" iergendwo draußn am stådtrånd.
frieher håts dorfschuln gebm. freilich wårn då oft amål 45 und mehr kienda in aana aanklassign schual. åba går so bleed und ungibüldet seind de aa niet ins lebm ause entlåssn wurdn, und des ohne schulpüschelogn und kriehseninterwentzionszentren..
frieher håt die kirchn niet lei an turm, sundern aa noch an pfårra ghåbt.
frieher håmt niet lei leit in an dörflen gwohnt, sundern freind und nåchbårn - wo aana aufn åndern gschaugt und ihn gekennt håt.
frieher håt a jeds dörfle sei postamtle ghåbt, heit wernt gaxt wieda - wenn da penziehn noch tajara werd - de postreita und de postkutschnen auftauchn - oda es werd ållas wegratzionirt und mia können uns gaxt unsriege briaflen im postvateilazentrum in fiellah-sangtmagdalehn sölba åbholn.
frieha- ....
i hear eh schon auf. i waaß, i bien sölba a sudhefn, åba iergendwia tuatz ma schon a biessale laad um de ålte zeit, wo noch die leit aana miet dem åndern gredt håbm und niet ieba a ölecktrohnisches kastl mit an haufn knöpflen, de wo fier uns ålte taggln vül z'klaan sein (so dass man ållaweil aufn fålschn druckt). åba dafier seimma ieberåll und jedazeit miet da gåntzn wölt vabundn und erreichbår.
schöne neue welt (a. huxley)
vur lauta tschentschn und plärrn hättet i båld vagessn eich ålln an guatn morgen und an scheenen tåg zan wientschn. jåjå, da alzi.... | 
