jå, åbgikuahlt håtz ånständig, kaum 14° håmma. ies lei guat, dass es ållaweil wås zum jammern gibt. kaum ies es a påår tåg haaß und schwühl und ålle leit meckern zwengs der hietzn - schon dabårmt siech da petrus und schickt a ånders weetta. und glei haaßtz wieda "a so a sauweetta, des soll a summa sein?" stått dass ma sågn taatetn "danke petrus, wia du schaugst auf uns!"
und die metolololognen und åndare wiesen-schåftla schiempfn ieber die glimmererwärmung. wo des noch hienfiehrn werd miet da umwölt-vaschmutzigung und die leit solln gfälligst ennerdschie-bewussta lebm und niet so vül miet senare moppalan und mini-pekawes sinnlos zur årbeit fåhrn und gachamål in uhrlaub. solln gscheita die biellign (hihi) öffis vawendn. (während die big-bosse miet senare fettn stienka-karossn sich die patschhandln reibm und senarn reibach zöhln - weil de seind eh in da miendaheit und des gips nix aus, wenn de in saus und braus die eisscholln in da arkties hienmåchn, so dass die årmen eisbeeren dasaufn. jå, so ies es).
und es aanfåche volk, wås ån der gånzn miserere schuld ies, gheart ånständig in die pflicht gnummen. umwöltstajern ghearn her. åba safurt! weil zum beischpül im golf a påår lietalan öl an bellikahn es gifieda vaschmutzn tuamt, då bist du schuld drån. i niet, weil i bin schon ån wås ånderm schuld. schuld seimma mir ållezsåmm ån iergendwås. die big-bosse niet, weil de årbeitn sooo hårt - wås man ån senare bischeidenen gehälta und diätn und erfolgsbrähmien sehgn tuat. a wia - i bin a gumminist? iesndesha? i håb noch nianiet gumministisch gwöhlt. naa.
naje stajern ghearn her, damiet dass unsare vaårmtn bankn ieberläben können tuamt. a sehgtz des dås niet ein, des pleampl, dass man in de krånkn und dahinsiechendn haatschertn göldinschtituhte wieda auf die fiaß hölfn muaß, ha? siehgst, des ies da ånfång vom end, stures volk. und dauernd ieber ållas meckern, wås unre bolüdüka tuamt. ginau wia beim weetta. gmeckert muaß sein. jå.
iii - i tua nianiet meckern, i såg lei, wås i knåpp vurm muntawerdn gitraamt håb. und i maan i traam ållaweil noch. odawia.
an guatn morgen und an scheenen sunntåg eich ålln!
