Sodala, då is er wieda, da Ruflo. Seas Kuhle.
Gehts eich guat?
A Wochn noch, nåachan is da Mai aa vurbei. Is fier mi a unhaamlieh stressiga Monat: a Firmung und drei Geburtståge fajern is scheen - åba fier so an åltn Gruftie seeehr stressig. Man wüll hålt schon liaba sei Ruah - und Kuhle iergendwia kånn i schon vastehn, dass deinige Drilling ållahånd Bewegung in dei Lebm bringen.
Es Weetta passt so hålbwex und i muaß mi aufrappln: Die vierhaxertn Freind, da Bello und die Sally schaugn mi schon so deppert ån. De wolln senare tägliehe Morgenrunde. (Schaugn, wås die Zeckn måchn).
Die Wåhl is aa vurbei und da Ålltåg håt uns wieda. Hiatzt können die Patajen und die ReGIERung weita wurschtln. Es Stimmviech håt sei Pfliecht getån. Es geht weita im åltn Trott und niex wöltbewegendes gschiecht, kaane umfåssendn Reformen, de uns vasprochn wurdn seind, lei die Händ aufhåltn und unsre Göldkåtzn auslaarn. Mir håms jå (zum Untaschied von die total vaårmtn Bankn) und da Herr Schwindlmeier werd schon wiessn, wohin mit die Milliardn. Die Räubeisn-Bank (Åbk. "Räuba") und da Herr Bröhl & Ko. können biråtend zur Seitn stehn. Da Herr Feigmånn sågg dazua "Wia Gott wüll - i hålt stiell." Und Reformen werdn schon kummen, iergendwånn amål. Steht in den Sternen, also weit, weit weg. Liechtjåhre oda so.
I werd's jå niamma dalebm. Daweil amål tuamma Schuln zuasperrn Postämta schliaßn (håt frieher amål aa funzinirt mitm Postreita und da Postkutschn), a påår Polizeiwåchstubm vaschwiendn låssn (die brauchn mir niet, weil es eh iemma weniga schliemme Leit gibt, de wo uns es Letzte klauen), hoffn, dass die krånkn Mäntschn ohne Klienick aa wieda xund werdn - usw.
Aua! Die Sally beißt mir in die kaum vurhåndenen Wadl und maant: "Hear endlieh auf mit'm Pflästern, bringt eh nix und gemma gscheita Gassi!" Okeh, des is a wåhres Wurt, aa wenns von an Huntalan kummt.
Und i tua aa mei Pfliecht und rausch åb mit die Wuffzis.
Pfiateich und an scheenen Montåg!
| 
) und des mit dem "Håslrausch" håb i bis heit aa nit gwusst, bis mir a Nåchbårin gsågt håt, sie werd schaugn obs noch an Håslrausch gibt. Miaßatn mir den Herrn Brufessa vom ORF-Kärntn frågn, wo des wietzige Wurt her kummt. Vlt. weils Maiglöcklen durtn gibt, wo a Håslnussstaudnen wåxn und "Rausch" håt siehalieh eppes damit z'tuan, dass de Luadern recht gieftig sein tuamt.