Schon wieda Såmståg. A scheens Wochnend wientsch i eich.
Hiatzt gehts rund mit die Summa-Acktivitättnen: Beim Villacha Kirchtåg dawårtet unsa Stadtle wieda ieber a hålbe Million Besucha und am Wertasee werdn wieda Brumminente, echte und settene wo maanen se seins, Adabeis und Schickimickis, Berufs-Büffehlaarfresser und aa aanige Fette "Plantsch" måchn, in Klafu kummt wieda die Bitch-Wolle-Båll-Maastaschåft, in die Nockberg singt des Quintett wo Siebene seind und an Haufn åndare Schtars dass die Ålm lei so hüldert bei "Wenn die Musi spült", undsoweita undsoweita...
Warat hålt scheen, wenn unsa-aans an Göldscheißa hättet so wie in da Gschicht vom Tischleindeckdich. So is hålt leida mehr zur "Deckestreckdich". Åba man muaß jå niet ieberåll dabei sein. Dahaam is aa scheen (Da Fux sågg "Die Traubn seind eh lei sawa").
I suach mir hålt a Lawuhr, schiett a Wååssa eine, stell meine Haxn eine und denk ma i bin bei da Fette Plantsch dabei.
Und wenn mei Mitzale wüll, siengen die Folksmusikantnen im Tefau. Lei wenn sie wüll, sunst niet - weil es Xangl ies eh lei ållaweil es Sölbe. Mir können jå aa sölba juchezn und singen. Måcht niex, wenn a biessale fålsch is - da Folksrocknrolla triefft aa niet an jedn Ton. Und die maastn "Schtars" siengen eh lei im Bläh-Bäck.
Sodala - wia xågg: A scheens Wochnend und bis båld wieda amål. | 
