seas wuhte.

befur du hiatzn wieda in dein wochnlångan wintaschlåf vafållst und es andyle sågg, dass bei uns kana nix eineschreibm tuat, muaß i da eppes dazähln, åba pass auf, i såg da glei – des werd a långe gschicht. also blattl liaba weita, wånnst nit so guat bist beim lesn.

schtell da vur, i hån dem liabm teifl, wo mi ålleweil im tefau so herzlich ånlöchelt und sågg: „ihr robert schwartlauer“ zwaa neiche uhrwaschl åbgekaaft. elliktronische!
Seit dersebm hear i wieda die fegalan singan und aa, wås mei mitzale zu mir sågg, wånn se redt. zwaa! a linkes und a rechtes. ausschaugn tua i wia a ällien, åba weil i hiatztn jå wieda an guatn empfång håb auf meine lauscha, håb i mi gestan getraut, den ORF einzanschåltn. des wår a folle gaude!

z’erscht håm då de hintatupfinga såckhupfa gsågg, dass se a neiche zedee håbm tuan und dass ma mir de kaafn solln, weil de hiatztn derårtig gienstig is, a wånn ma mir se nit brauchn tuam – de vom ORF kriagn aa a biessele wås davon und dås gheart anfåch zua da gultur dazua.

nåacha is da scheene blonde hanseeee, waßt eh, der mit de zottatn munnbutz, kumman und håt g’juchatzt. då hån i es erste mål in meim lebm vur lauta riehrung greart, weil i seine sinnreichn texte vaschtåndn und gmerkt håb, dass der jå a biessele singen aa tuat.

åba dånn – i sågg da, na, wånn i amål hien bin, i geh da nit då obm aufe harfm und psalta schpüln – bei dera hitz! i wüll då åbe, wo se a fiellaha håbm tuan. hån ållweil gedåcht, untn is haaß und obm ångenehm küahl bei de engalan. jå, schneckn! der mit dem vaklärtn blick von de spatzlrutter kåstn, wo dås jå wissen muaß, håt nämlich gsågg, „ewig muaß da himml brennan“ (oda hån lei i fålsch vaschtåndn und da erste buckschtåb wår a „p“?).
nåjå, jednfålls håbm de aa a neiche zedee und „wånndimusischpült“ aa und mir solln dås uns jå schnell im ORFschopp kaafn. is wichtig, weil da ORF braucht es göld, damit dass er uns a gultur beibringen kånn.

und dånn - åba då wår i fåst a biessele traumatisiert – då håt ane a leeffele jockhurt gfressn und so laut gezwiellt „maaa is deeees guat!“ dass ma meine illektrischn uhrwaschl ausa gflogn sein.

wår als näxtes eh lei ORF-werbung fier schlosshotel und traumschief und rossamunde pieltscha und des kenn i eh schon und dås henkt ma schon durtn ausa, wo i meine zwa illektrischn schwartlauerlen eineschteck…

daweil dass de teppatn aufgeblåsanan hundling in roat, blau und grean an lotta auf die haxn ghupft sein und a zoodirekta gsågg håt, mia miassn aufpassn, dass uns da schpeck nit dawischt, håb i se wieda gfundn. die uhrwaschl. und im ORF wårn daweil de lustign ixixixlutzler. åba då bin i glåcht! haha. und nåacha håmt se gwurbm fier ållahånd schtinkasaftlen, zum bleischtift fier afterschweif (mit dem soll sich da tate es gfrieß nåch’m rasiern einpalsamiern)

die näxte sendung wår dånn „jörgale heite“, mit wieda neiche iewents und brojekte, und da gensa håt, wia imma, so liab åbagegrinst vom tefauschirm, i hättet ihn am liabstn herghålsn und a biessele niedagschmust.

und nåacha wår wieda werbung und då brauchst lei obm lesn, wås i då ållas gsehgn hån.
wia i beim jockhurt wieda meine waschln suachn gångan bin, wår eeh schon die ZIP drån.

då håt da schiessl (mir håmma aa an auf da wånd, då sehgn mir sunstn de illegalen tefau-senda) ane von seine söltenen wurtmeldungen g’schobm und håt unta ånderm behauptet unsa årma karlheinz is dodal unschuldig und mir brauchn åb safurt aal lei mehr dås vaschteiern, wås ieba 280 000 teuro ause geht. ållas wås drunta is, sein geringfiegige beträge. Då håb mi dånn aus dem zirkel der schteiazåhla vaåbschiedet, weil soo wenig göld wer’ i nianit håbm in mein lebm, und håb werbung gschaugt.
beim näxtn jockhurt sein mir die waschln niamma ausagflogn, weil i se eh niamma drin ghåbt håb.

und wia i dånn bei da sendung mitm första eingschlåfn bin und a påår festmetalan klaangsaglt hâb, und mi mei weible erweckt håt, håb i niamma gwußt, wia se haßt. åba gottzeidånk is ana von da schbårkassa kumman, der håt ma a so a rundes blastikglumpp ins maul gschteckt, då håb i wieda gwusst, se haßt mitzale. jåjå, so is hålt es gånze jåhr fåsching bei de kiniglhåsn am kiniglberg unfd obmdreinå ållweil gultur in reingultur.

und wånn hiatzt noch ana sågg, i bin a schreibfaula hundling – dem wer’ i’s åba zaagn. Der kriagt dånn de furtsetzung von meine tefau-alebnisse zan lesn. zum bleischtift, dass de beim ORF um viere in da fruah fier unsare liabn gschrapplen schon japsentrickfülme sendn. damit dass die madln und buabalan vurm schualgeahn aa noch a biessele gultur tankn können. miaßt’s es hålt aufweckn, enkare liabn klaanen, und wånn se tschentschn senen beibringen, dass gultur aanfåch sein muaß. denkt’s lei amål auf die pisser-studie…. und fier die maame håmma dånn eh am vurmittåg und am nåchmittåg wieda die zwaatausnddreihundertsexesechzigste wiedaholte wiedaholung von "schiach und årm". sovül zur gultur.

i maan , i hån mir mein wintaschlåf vadient und kriach untern gulta.

pfiateich, des hund – und bleibz xund!