an guatn morgen und an scheenen (???) tåg eich ålln. mummentahn ies es noch neblig triab, åba wås niet ies ...
und murgn ies da kärntna fajatåg. kärntna ånzug håb i kaan und i möcht mir aa kaan zualegen, solång des bei uns iemma noch a so a årt gidenktåg fier eppes ies, wås fåst hundert jåhr zruckliegt und iemma noch so vül ewiggestriegen ånlåss fier hetzarei und auffrieschung da bluat-und-bodn-bolüdük ies.
wånn werd des endlich aufhearn und aa bei uns då ånkummen, dass mir im aanezwanigstn jåhrhundert leben und niet im lånd "wo man mit blut die grenze schrieb"?
i werd des siehalieh niamma erlebm, åba i hoff es beste fier unsre kienda und enkalan, dass de endlich in an landlen leben können, wo toleranz und gideihlieches mietanånda vurherrschn und niet engstiernige vabohrtheit und ignoranz. und in dem sinn wientsch i eich "dober dan" - åba niet dober nig. *)
___________________________________________________
*) des sågt aana, der vur fåst 77 jåhr in villach geburn wurdn ies, und der hiatzt niet waaß, ob er a echta kärntna ies. ies wohl sei gånzes långes lebm dådedå dahaam gwesn. und sei våta ies "fürs vaterland" am schlåchtföld gebliebm. åba sei muatta ståmmt ausm gailtål ... und då kånn man jå nia so ginau wiessn ... (aa wenn da großonkl die ehrnbürgerschåft da stådt villach valiehn kriagt håt). werdn mir hålt amål beim herrn låndesråt nåchfrågn, wås er maant.
