Da Villacher Kirchtåg ies mir nit so wurscht, wia da Dschordschie. A so a Tiaata, wås då mit dem klaan Tschwutschkalen aufgfiehrt werd, naa, ... und zu dem wunzign Hosnscheißa muaßt "Königliche Hochheit!" oda so aa noch sågn. Årg, hearst. "Haben Königliche Hoheit wieder die Pämpas vollgekackt?"
Und wås den ORF ånbilångt: der kånn mi Bugglfünfern. Wia du waaßt bin i hörbehindert und muaß beim ORF-Schaugn Kopfheara trågn, damiet dass i wås vasteh. Åba wås de ORFler mit senara grauslichn "Musik" zwischn zwa Brugramme, oda Werbeblöck und oft amål ålle påår Minutnen auffiehrn, des Gepiepse, Geschmurgl, Geröchel, Maschinengiwährgeknåtta und so weita, des ies so årg, dass es dir sugår mit die bestn Kopfheara bis ins Hiern eine fåhrt.
Då gehts die gånze Zeit lei mehr "Pieppiep-gåggåg-pengpengpeng", sugår während die Nåchriechtn. Und wenn dånn beim Zippfläsch im Aansa noch der schöne Månn so affektiert ausagrienst und die gegrudlete Weettafee uns eppes vursetzt, wås "Weettavurschau" haaßt - jå, nåachan reichts mir und i fråg mi, fier wås dass mir die hoachn Tefaugibiehrn zåhln miassn. Im Aansa reckt dir a Brumminenta a Runklruabm entgegn und schreit "Eins", und im Zwaara fåhrt aana von de Zwilling in Hiemml und da zweite direkt åbe zan Beelzebuam. Pieppiep.
Und die "härrliehe" Untamålungsmusik ist maastns so laut und gruselig, dass man von dem, wås man vastehn soll, eh niex vasteht. Danke ORF - es gips åndare Sender. Und sugår gratis.
Wenn da ORF amål a ächt guate Sendung håt, muaß de zwengs de Spårmåßnåhmen demnäxt eingstöllt werdn. Jå, so ies es.
| 
