>>> "bei uns wornt kane do, denen gehts wohl z`guat?" <<< hihi, vielleicht håst åba lei du z'grantig gschaugg und es håt sich kaana einegetraut?
"... und es jåhr kriagt a gwicht ..." haaßt's in an kärntna liadlen und ginau so ies es. heit' und zwaa tåg noch, nåachan ies 2012 histerie. und des ies da grund, dass am sülwesta so vül leit histerisch werdn, bölla schiaßn, rakettnen åbfajern, sich zuasaufn bis zum geht niet mehr und am erstn jänna schleichn die schwårzn kåtern umma und sekkiern die leit.
des grausliche geballare geht nit lei mir, sundern aa in die årmen viechalan årg auf die nerfnen. mir tuan die huntalan und die katzlen und es åndare viechazeigs (im wåld!) laad, de jå niet wiessn, warums die hålbe nåcht hüldert und rumplt und glietzert und leichtet. de maanent valleicht, es geht die wölt unta. und es rehlein vatiaft siech in sei letztes gebetle, bivur dass es jiengste giricht ausbricht. und wenn aana sågg, da riechta ies eh lei "eine kröte" - der werd vascheucht.
wåhrscheinliech bien i jå lei a bleeda, ålta - wia da kuhle ållaweil sågg - nussnsåck, åba i håb noch nia in mein lebm an bölla oda a leichtrakettn ångegrieffn und trotzderwegn scheene und lustige jåhreswexl ghåbt. und aa musik-antnstådl brauch i kaan dazua.
håt er fier heit' ginua getschentscht, da ruflo? i maan wohl. drum finito und aus.
i wientsch eich an scheenen såmståg und a suppa-wochnend.
