Wal des Rezept so guat is, komm des nit nua da Coolati allan hobn!
Also, zeast tuast den Readl amol stechn. oba nit auf ana Wiesn, wo da Baua grod mit da Jauchn umatumgfoan is. Was eh, wia da Readl ausschaut, oda? Nimmst nua die klanen zoatn Readln und stichst se als a gonza aussa.
Daham tuast de Readln donn putzn, untn den rest vom Strunk wegschneidn, de braunan Blattl aussn wegzupfn, und de anzlnan Balttln schean sorgfältig Woschn.
So nun kummt a supa Trick:
Tuast de gwoschanan Blattln fia a zehn, fufzen Minutn in a woames Wossa legn, des ziagt des Bittare aus de Blattln aussa.
Danebn tuast schon a poor Tschompe kochn.
De Marinad mochst mit an Kremser Senf (ca. 1 Esslöffel voll oda mehr), an guatn Opflessig (ca. 1 Esslöffl), a bissl Zucka (ca. 1/4 Teelöffel) tuast a eine. A bissl an zadrucktn oda klan gschnittanan Knofl konnst wennst mogst a eine tuan, des is Geschmockssoch. Natürle a bissal Salz und dann a guates Öl, i nimm imma a Kernöl (ca. 2 Esslöffel). De Marinad mochst schen ob, und donn tuast de Readlblattl eine und mischt des gonze duach. De Blattl konnst a bissl schneidn vuaha wenn wüllst, i loss es gonz. Danebn tuast a bissl an klan gschnittanan Speck onbrotn. In den obgmochtn Salot mischt donn de noch woamen gschnittanan gschöltn Tschompe eine, den woamen Speck drunta - a knuspriges Buttabrot dazua und fertig is de Gschicht.
Schmeckn tuats supa und xund is!
A simbolisches Bussale
aufs Wangale
vom Evale | 
