Da Åschamittwoch
Da Pfårra und da Mesna
send in da Sakristei
Am Fåschingdienståg Nåchmittåg
er wår schon fåst vorbei.
Da Pfårra frågt den Mesna hiatz
wia werd dås morgn sein?
Es tomb sich schon an Haufn Leit
Auf's Åschnkreizle gfrein.
Lei i allan bin schon zu schwåch,
dåß i so viele Kreize måch.
Deswegn Mesna warat fein,
wonn du kintast mei Helfer sein.
Aus Staub bist du geworden
zu Staub kehrst du zu zurück
Dos Sprüchle is jo eh nit long
zu deinem großen Glück.
Genau die Wörta muaßt do sågn
und terfst dabei nit låchn
wonn du mir morgn helfn werst
die Åschnkreiza måchn.
Dem Mesna wird gånz ånders hiatz
er wird a schon gånz blach
wås er då morgn måchn muaß
dö Knia wernd eahm schon wach.
Da Mesna is die gånze Nåcht
ban Sprüchlan lernen gwesn,
håt in da Fruah in seina Noat
den gånzn Såtz vargessn.
Deswegen tuat er vor da Mess
den Pfårra wieda frågn:
Du Pfårra wås muaß i den heint
zu unsre Sünda sågn?
Da Pfårra tuat dås nit varstehn,
wia man so tumm sein kånn:
DU BIST A TEPP UND BLEIBST A TEPP
fåhrt er den Mesna ån.
Dem Mesna kimmt dås Spanisch für
und a nit går so fein,
jå åba wenn's da Pfårra såg,
dånn werd es wohl so sein.
Dö Tür geht auf dö Orgl spielt
dö Mess dö beb hiatz on,
jo und alls Ersta von dö Leit
då is da Bürgamasta drånn.
Da Mesna håt eahm mit bedåcht
a Åschnkreiz auf's Hirn gemåcht
und dabei såg da Mesna Sepp:
DU BIST A TEPP UND BLEIBST A TEPP
Da G'meindechef is gånz vardutzt
und håt den Mesna gfrågt:
A håt da Pfårra früheramål
nit gånz wås åndres gsågt?
Jå fralle sågt da Mesna drauf,
dås werd gånz gwiss so sein
weil frühra håt ma ånders g'redt
då wår jå Ålls LATEIN.
s' Wastale
du
| 
