an guatn morgn, winsch i eich!!
uuuuaaaaah, huschi. brrrrrrrrrrrrr, is mir kolt.....
@ruflo: i klatsch imma acrylforbn on de keilrohmen.
danke fir den tipp. weri mol schaugn gehn, ob i noich a poor rohmen kaaf. daweil honi zwor eh noch an haufn unbemolte daham wortn, oba wenns mi ibakummt, donn vaschmier i imm aglei a poor :)
i brauch holt leida imma so long, bis i waaß, wos i eigentlich moln wüll. i tua jo nit so frei von da seele. i suach ma imma irgend a motiv. so anfoch drauf los, des bring i nit zommen.
wenn i ma wos ausgsuacht hob, donn fong i amol on und im endeffekt schauts donn eh gonz ondas aus, ols des, wos i mochn wollt. oba de grundidee muass i ma imma fladan ;-)
i hob ma jo beim hofer aa so a packet gikaaft (9,90) wo 4 vaschiedene pastn drin send. do konnst donn so dicke konturn draufspochtln. des muass ma austrickan lossn, donn konnst mit ana forb driba gehn. sowos gfollt ma im moment so guat.
wenns wetta bessa wert, donn fohri von mittwoch bis freitog wieda ins burgnlond/oberwart obe ins haus zu de freind mit de kinda. do konn i wieda auf mein heibolln sitzn udn den nochborsbauern sein stoll unsicha mochn ;-)
gfrei mi schon.
murgn is noch a klaana ausflug mitn papa ins kh lainz in de zohnklinik geplant. do muass i (mittlwerweile zum drittn mol) zu an gespräch mitn an anästhesistn. weil am 3. sep. is donn entgiltig de zohn-op.
da papa tuat ma jo schon so laad. hiatzand muass er in de letztn wochn schon sooft, unnätig durch gonz wien zu an zohnorzt. jedesmol schickns uns wieda unvarichteter dinge ham. beim erstn mol hot de station an folschn termin ausgmocht. des zweite mol, wors lei a onschaugn vom papa. des dritte mol wors lei des onschaugn vom papa und den hinign zähnt, murgn is des anästhesitngespräch, wo da papa aa wieda dabei sein muass und dann is endlich soweit.
wenns mi frogts, olles a bissle unorganisiert und schikane. an kronkn mensch so in da gegend umakutschiern. des is eh jedesmol a tortur fir eahm, weil er sich nit auskennt, wos mit eahm passiert.
sowos miassat doch mit zwamol zu erledign sein. 1 x onschaugn und glei gespräch, des nächste mol op.
oba na, do wert 20 x kronkntransport bezohlt, obwohl eh olles so teia is und de kronknkasse jo so sehr sporn muass, und an bettliegrign menschn zusätzlichn stress gmocht.
des system is schon a wohnsinn.
sodale, hiatzand honi mi wieda genug auslossn iba olles, hiatzand moch i mi wieda on de orbeit ;-)
winsch eich wos....
